Moody’s agentliyi Bank of Baku-nun reytinqini yüksəltdi!

Moody’s beynəlxalq reytinq agentliyi dərc etdiyi son hesabatında “Bank of Baku”-nun reytinqini yüksəldib.

Belə ki, bankın yerli və xarici valyutada uzunmüddətli depozit reytinqi Caa1-dən B3 səviyyəsinə artırılıb. Agentlik eyni zamanda, Bank of Baku-nun baza kredit qiymətləndirməsini Caa1-dən B3 səviyyəsinə, yerli və xarici valyutada uzunmüddətli kontragent risk reytinqini və uzunmüddətli kontragent risk qiymətləndirməsini B3-dən B2 səviyyəsinə qaldırıb.

Agentliyin qeydinə əsasən, Bank of Baku-nun öhdəlikləri əsasən müştəri depozitlərindən və Mərkəzi Bankın maliyyələşməsindən ibarət olan maliyyə və likvidlik göstəriciləri stabildir. Həmçinin, 30 sentyabr 2020-ci il tarixinə əsasən, bankın likvidlik göstəriciləri yüksək səviyyədə olub, ümumi aktivlərinin 30%-ni təşkil edib.

Bank of Baku-nun maliyyə vəziyyətinin sabitliyi və likvidlik göstəricilərinin stabilliyi də agentliyin hesabatında öz əksini tapıb.

"Moody’s” ekspertlərinin rəyinə görə, bankın reytinqlərində bu yüksəlişin səbəblərindən biri də Azərbaycan Respublikası Prezidenti Cənab İlham Əliyevin imzalamış olduğu “Azərbaycan Respublikasında fiziki şəxslərin problemli kreditlərinin həlli ilə bağlı əlavə tədbirlər” haqqında fərmanın icrası çərçivəsində kreditlərin restrukturizasiyası istiqamətində görülmüş işlərdir.

Qeyd edək ki, Bank of Baku 5-i regionda olmaqla, ümumilikdə 18 filialı ilə 1 milyondan çox müştəriyə xidmət göstərir. Bank haqqında ətraflı məlumat almaq üçün Bank of Baku-nun 145 Məlumat Mərkəzinə zəng edə və ya bankın rəsmi veb səhifəsinə-https://www.bankofbaku.com, Facebook səhifəsinə www.facebook.com/bankofbaku daxil olaraq daxil olaraq tanış ola bilərsiniz.